قصيدة العريس جيه وأنا مشيت للشاعر محمود الحضرى من ديوان الحياه

((العريس جيه وأنا مشيت))

العريس جيه يا ولاد كله يهيص
دا البنت الحلوه اللى حبيتها جالها عريس
ووافقت عالجواز .. وقالت دا إبن ناس
وإن اللى كان بيننا كلام عيال تهييس
-------------------------------
العريس جيه طاير وخدها عالحصان
آل إيه هوا راجل وأنا طلعت مان
وعماله تحب فيا وأنا عامل هيمان
ولما جيه اللى معاه إشتريته بالمجان
-------------------------------
العريس جيه محمل وشايل شنط فلوس
وأمه بتبخره وآل م العين محروس
وأنا الغلبان .. اللى كنت بحب زمان
إتحلقلى لما جيه العريس بأجدعها موس
-------------------------------
العريس جيه والبنت لسه بتتعلم
قالولها لازم تتجوزيه وهيا مرديتش تتكلم
قالتلوا موافقه يا بابا .. وعزفتهاله عالربابه
وآل زمان كان قلبى ليها مسلِّم
-------------------------------
العريس جيه يخطب يخطب حبيبتى وأنا مشيت
والله خساره .. دا الكلمه دى عشانها ياما ضحيت
آل حبيبى آل .. والله ما تستاهلها
أهى إتخطبتله ورميتنى بإديها جنب الحيط
-------------------------------
فين أيام الحب اللى قضيناها سوا
مبقالهاش لزمه ونسيانها هوا الدوا
كان مابيننا حاجات كتير .. تتحكى فى أساطير
بس لما جيه اللى يشيل .. كله طار فى الهوا
-------------------------------
أصل العريس لما جيه قال معايا ومعايا ومعايا
ولما لقيته محمل إتغريت فى الهدايا
ماهى لو مكانتش لقيت كانت مشيت على هوايا
بس بفلوسه أهو شال وكتب على حكايتى النهاية
-------------------------------
كلها كام يوم وتيجى تقوللّى ياريتنى
وتجيب عليا اللوم وتقوللى إنتا اللى رميتنى
وسيبتنى أضيع منك وكنت فاكراك حبيتنى
بس للأسف سيبتنى لية ونسيتنى
-------------------------------
هوا محسنيش وقسى كتير عليا
خلانى ندمت على يوم سابت إيدك إيديا
سامحنى أنا الغلطانه إعمل اللى تعمله فيا
بس نرجع تانى لبعض دا من الدنيا إنتا اللى ليا
-------------------------------
وساعتها ردى عليكى هيكون كلام قصاقيص
أنا ضحيت عشانك وإنتى بيعتى بالرخيص
وبيعتى اللى بيننا وإعتبرتيه كلام عيال
ونسيتى كل حاجه أول ما جيه العريس
دلوقتى أنا إقتنعت إن اللى كان بيننا .. كلام كله تهجيص
-------------------------------

مع تحياتى .... الشاعر / محمود الحضرى

eng_mahmoud_elhadary@yahoo.com

http://www.mediafire.com/?9q2yu2h54zq47

https://www.facebook.com/note.php?note_id=10150119666754848

» قصيدة محمود بك الحضرى للشاعر محمود الحضرى من ديوان الحياه
» قصيدة سامحينى للشاعر محمود الحضرى من ديوان الحياه
» قصيدة مات الأمل للشاعر محمود الحضرى من ديوان الحياه