Mahmoud Elhadary
Admin
عدد المساهمات : 746
تاريخ التسجيل : 10/08/2009
العمر : 33
الموقع : طنطا
 | موضوع: قصيدة محمود بك الحضرى للشاعر محمود الحضرى من ديوان الحياه  الثلاثاء مايو 11, 2010 3:49 pm | |
| أولا يا جماعة قبل ما تقروا القصيدة محدش يفهمها غلط انها غرور وكدا يعنى .. والله هيا فكرة وجاتلى قولت اعملها .. بس يارب تعجبكم
*******************************************************
(( محمود بــك الحضرى ))
كنت قاعد وسط أصحابى بالليل وسهرانين
سألنى واحد منهم .. يا حضرى إنتا مين
قلتله أنا اللى مجاش منى عالأرض إتنين
وأنا اللى لما أموت هتفتكرنى السنين
**************************************
هيكتبوا إسمى فى كتاب التاريخ
وذكرى يوم ميلادى هيبقى أعظم التواريخ
وهيعملوا فية حفلات ويولعوا الشماريخ
والناس هتملى العالم من الأرض للمريخ
**************************************
أنا ... وأعوذ بالله من كلمة أنا
محمود بك الحضرى شاعر الحزن والهنا
طللعت ناس كتير من الضلمة وحققتلهم المنى
وعيشتهم فى كلام حقيقى مش بس كلام غنى
**************************************
لكل واحد واقف قدامى وعاوز يكسر طموحى
هقوله كلمة واحدة بس .. كتبتها شعار فوق سطوحى
أنا اللى إتحديت الزمن عشان أبقى أنا
وأنا اللى إديتك أمل لما كتبتلك بروحى
**************************************
دا مش غرور ولا كبرياء ولا هوا كلام وبس
دا حياه وتجارب سنين إديتنى ثقة بالنفس
أنا زى أى واحد بتألم وبحس
بس صوتى عليى بعد ما كان همس
**************************************
أنا اللى داويت الجروح وقربت الأحبة
ولسة هصلحك يا دنيا بس حبة بحبة
ومش هعمل زيك وأعمل من الحبة أوبة
ولا أخلى الناس تتوه وتقول عالفول إسكالوبة
**************************************
أنا مش هخاف يا دنيا إنى فى يوم كتبت
ولا إنى إديتك أفراح مهما من أحزانك شربت
وهفتكرلك إنى لما فى يوم إنجرحت
قويِّتى جرحى عليا ونزلتينى من فوق لتحت
**************************************
حطيت أحلامى قدامى وحققت منها كتير
ولما دمرتينى وبقيت ليكى أسير
فضلت أحارب قوتك بالعقل والتفكير
وعملت من قوتك شاعر وحولت أسيرك لأمير
**************************************
ياريت يا ناس تفهموا بجد أنا مين
أنا اللى كلامى غيَّر أفكار شعوب ملايين
أنا واحد بكتب شِعر مش بس من سنتين
دانا من 11 سنة وأنا شاعر الليل الحزين
**************************************
عِرفتوا بقى أنا مين ولا لسة بتسألوا
أنا ياما جالى ناس كتير ومن كلامى إتعلموا
وكلمة هقولهالكم وطول مانا بكتب إسمعوا
وأوعوا حد يسكّتكم أو فى يوم تستسلموا
**************************************
أيوب ياما صبر وصبره فاض على صبرى
والصبر علمنى إنى أكتب .. لحد ما يخلص حبرى
ومهما إتهانت منك يا دنيا هفضل فخور إن قدرى
أتولد فى يوم وأكون محمود بك الحضرى
**************************************
ياريت يا ناس تكونوا عِرفتوا أنا مين
أنا مش بفكر بقلبى بس .. ولا بيغلبنى الحنين
ولا عمرى يوم إتغريت ولا كنت من المغرورين
بس كتبت القصيدة دى عشان تفتكرنى السنين
وتفتكرلى إنى كتبت لأيام الفرح .. وكتبت أكترلأيام الأنين
**************************************
مع تحياتى .... الشاعر / محمود الحضرى
eng_mahmoud_elhadary@yahoo.com
رابط تنزيل القصيدة
http://www.mediafire.com/?nvxjhqt2nin
رابط القصيدة عالفيس بوك
https://www.facebook.com/note.php?created&&suggest¬e_id=441551609847
| |
|
