قصيدة عاوز أتجوز للشاعر محمود الحضرى من ديوان الحياه

(( عاوز أتجوز ))

عاوز أتجوز يا ناس بس منين

لا فية حبيبة ولا شقة ولا حتى مدّكن قرشين

طب أعمل أية وناقصنى على قطر الجواز سنتين

وكل اللى فى سنى إتجوزوا وأنا اللى فى الرجلين

*****************************************

عاوز أتجوز وأعمل أسرة وأعيش حياه مستقلة

وأشرب بيبسى فى كانز وأنسى الشرب فى القلة

وأبقى كبير الحتة ولا حد يمسكلى ذِلْة

وأبقى راجل ملوّ هدومى مش حتى عيل فانلة

*****************************************

آل أية الجواز قرف طب إحنا مجربناش

خلونا نجرب وساعتها يا نرضى يا منرضاش

مش عارف لية مقفلينها ويقولولنا بلاش

هاتولنا بس عروسة وبعدها إدّونا الطناش

*****************************************

يقولك عيش حياتك وأما تخلص إتجوز

طب أعيش حياتى إزاى وأنا لسة مفلس

وأنا عارف هخلص إمته .. مش يمكن لما أعجز

والله أنا إتخنقت .. أهو دا الكلام اللى ينرفز

*****************************************

عاوز أتجوز .. حد يقوللى يا ناس أعمل أية

كل حاجة غليت ومحدش عارف لية

دا حتى التاكسى أبو عداد بقيت التوصيلة ب3جنية

والفرق وسع يا عالم ما بين الفقير والبيه

*****************************************

العيش اللى كان زمان بنلاقية عالسطوح

بقينا بنموت دلوقتى عشان نجيبة بطلوع الروح

طريقنا كان زمان مستقيم وكنا علية بنييجى ونروح

دلوقتى بقينا بنقع وصبح الطريق ملووح

*****************************************

أتجوز عُرفى يعنى ولا أهرب بره وأعيش

وأعمل اللى أنا عاوزة وأقول متسألونيش

مانا لما أخترت الحب الحب ماختارنيش

ولما أخترت أتجوز فلوسى مكفتنيش

*****************************************

عاوز أتجوز يا عالم وأجيبلى حتة عيل

وأهزئة براحتى وأقولة قرفتنى يا منيل

عشان مبصش بره وع بنت الجيران أميل

ومش فارقة معايا هناكل كتير ولا قليل

*****************************************

مش فارقة معايا اللى هتجوزها فتكات ولا عدلات

المهم تصون العِشرة ومتصدقش الإشاعات

وتجيبلى حتة عيل ينسينى اللى فات

ويدعيلى بالرحمة لما يعرف إن أبوه مات

*****************************************

وآهى كلمه قولتهالكم وعالدنيا السلامات

جوزونى جوزونى بدال ماعمل إنقلابات

أنا مش عيل سيس ولا واحد من الهفقات

إحترموا كلمتى وجوزونى وستّروا البنات

*****************************************

مع تحياتى .... الشاعر / محمود الحضرى

رابط تنزيل القصيدة
http://www.mediafire.com/?gcgqynjw2gm

رابط القصيدة عالفيس بوك

https://www.facebook.com/note.php?created&&suggest&note_id=435516814847

» قصيدة محمود بك الحضرى للشاعر محمود الحضرى من ديوان الحياه
» قصيدة ما الهوى للشاعر محمود الحضرى من ديوان الحياه
» قصيدة حياه حب للشاعر محمود الحضرى من ديوان الحياه