الفرق بين السكشنجيه و المحضرجيه

احنا : بنحضر المحاضرة بعد نص ساعه أو ساعه دا او كنا بنحضر

هما : ييجو قبل المحاضره بنص ساعه عشان يحجزوا


احنا : ممكن نقعد في البنش الخامس أو السادس أوالسابع أو .................





هما : الواحد منهم لو ماقعدش في البنش الأول , أو – لاقدر الله – التاني , ممكن يجيلو سكتة قلبية , وحالته النفساوية تتدهور, ومش بعيد يخرج بعد المحاضرة يبعت مشكلته لمحمود سعد في البيت بيتك, يطالبه بضرورة تدخل السيد المسؤول وزير التعليم العالي عشان يصدر أوامره للدكتور عشان يعيد المحاضرة , بعد ما هو يقعد في أول بنش .




احنا : ممكن نجيب معانا بالكتير كراسه 24 ورقة , مقطوع منها 6 ورقات , وقلم جاف يا اما خلصان , يا اما بيقطع.



هما : أولا لازم يكون معاهم شنطة , فيها ايييييييييييييه ؟

فيها كشكول محاضرات مش أقل من 200 صفحة (لو 199 يرميه ويجيب غيره )

أقلام جاف بجميع الالوان والاشكال (من أول القلم الي بيتكتك , والقلم الفرنساوي أبو نص جنيه , لغاية القلم الي مركبين فيه لمبه وبينور في الضلمة)

أقلام سنون(5ملم عشان الكتابة , و7ملم عشان الرسومات)

ورق فلوسكاب ودباسة عشان لو فيه امتحان ولا حاجه(الاحتياط واجب برضه)
وكمان الشنطة فيها (كتاب المادة , ملخصات في المادة , مسائل في المادة , حبشتكنات في المادة)





احنا : لو غبنا محاضرة.........................عاااااااااااااااادي



هما : لو صحي في يوم ولاقي معاد المحاضرة فات , هيمسك المنبه ويكسره 100 حته , ويطلع علي الصالة ويقول بأعلي صوته : وااااااااه مصيبتاه ........ واااااااااااه أسفاه .......... وااااااااا لهواه , ولما أمه تصحا مفزوعة علي صوتة , تجري عليه وتقوله ( مالك يا ضنايا حد من اخواتك جراله حاجه؟ ) , يرد عليها : المصيبة أكبر , لقد ضاعت المحاضرة يا أماه , وطبعا الرد الطبيعي من أمه:معلش يابني انا لله وانا اليه راجعون







احنا : لو فيه امتحان , ممكن نذاكر


هما : لو فيه امتحان , يتحول البيت لثكنة عسكرية , يمنع فيها أي شخص من الاقتراب أو مجاوزة الأسلاك الشائكة التي تحيط بالغرفة والتي يحدث بداخلها حرب ضارية بين الطالب وجميع ما يخص المادة , ولو حاول أي متطفل من اخواته الدخول لغرفته , يتم أخذه أسيرا حتي يدفع والداه الفدية , والا يتم تعليقه في سقف الصالة ليكون عبرة لكل من تسول له نفسه للدخول عليه وهو بيذاكر


احنا : طول المحاضرة , يا اما قاعدين مبلمين , يا اما كل واحد بيتكلم مع زميله


هما : قبل ما الدكتور يدخل , يفتح الكشكول ويمسك القلم ويستعد لدخول الدكتور في أي لحظة (فممكن الدكتور يدخل ويتكلم ويكون هو لسه مافتحش الكشكول , ومن هنا تأتي الكارثة بضياع بعض الكلمات الي قالها الدكتور), وما أن يدخل الدكتور حتي تبدأ المعركة التي يراق فيها مئات الأمتار من الحبر علي كشكول المحاضرات الذي طالما اشتكى من ضربات القلم علي صفحاته



احنا : لما نخلص المحاضرة ممكن نقعد شوية في الجامعه.

هما : أول ما الدكتور يخلص محاضرة , يرمي العدة في الشنطة , وجري علي الميكروباص , وفي خلال فيمتوثانيات معدودة تلاقيه في البيت



الكلام دا كلو لو حد كان بيحضر من اساسو

هههههههههه والله جميل ومجهود رائع